Akizungumza na Waandishi wa habari, Afisa wa Kitengo cha Kujenga Uwezo kutoka katika Shirika la kuhifadhi Misitu Asili Tanzania Simon Lugazo ameeleza kuwa tafiti ambazo zilifanyika za kuangalia maswala ya kijinsia yalivyo kwenye vijiji zinaonesha kuzaa matunda ambapo utekelezaji na matokeo unaonyesha hivyo kupitia mabadiliko yaliyopo kwa sasa.

“Ukiangalia umiliki wa ardhi zamani kulikuwa na changamoto, akina baba tu ndo walikuwa wanamiliki ardhi kupitia hati za kimila lakini kwasasa kuna akina mama wengi ambao wamejitokeza na wanaweza kumiliki ardhi. Mamlaka ya maamuzi ilikuwa ni hafifu sana ambapo kwa sasa kuna mabadiliko makubwa sana tunaona akina mama na vijana wanachukua nafasi wanaweza kuongea kujieleza na kuhoji“, alisema Bi Kateta

Bw Simon Lugazo

Kwa upande wake Mtafiti msaidizi kutoka katika kituo cha Stadi za Taaluma za Kijinsia kutoka Chuo Kikuu cha Sokoine cha Kilimo (SUA) Emmanuel Mroto amesema kuwa matokeo ya tafiti yanaonyesha kuwa Wananchi wamekuwa na muamko katika utunzaji wa misitu na wanaona faida ya kuwa na misitu katika maeneo yao.

“Wengi wameongeza vipato vyao wakiwemo wakina mama na wakina baba lakini pia imetengeneza baadhi ya ajira ambazo hazikuwepo hapo awali mfano mama ntilie kuwapikia wanaopasua mbao au wachoma mkaa pamoja na uanzishwaji wa vikundi vingi vinavyowahusisha wakina mama ambavyo vimewasaidia kuwa na uwezo wa kuhimili mahitaji yao muhimu hivyo kuna muamko mkubwa wa kiuchumi ambao jamii zilizolengwa zimeweza kunufaika “, alisema Bw Mroto.

Emmanuel Mroto 

Kwa upande wake Afisa Mradi Msaidizi kutoka Jumuiko la Maliasili Tanzania Fadhila Kateta amesema kuwa Jumuiko huwa linawaanzishia wanawake bustani ndogondogo za kupanda miti mbogamboga na matunda ili kuhakikisha anaweza kukabiliana na mabadiliko ya tabia ya nchi ambayo yanaonekana kuwaathiri zaidi kwa upande wao.

“Tumejikita sana katika kuwajengea wanawake uwezo katika kumiliki kutumia na Kudhibiti ardhi ambapo atakuwa na uwezo wa kuitolea maamuzi kama vile mtu wa mwisho wa ardhi hiyo ambayo anauwezo wa kuuza ama kununua kama vile afanyavyo mwanaume“, alieleza Bi Kateta.
Aidha TFCG kupitia mradi huo imeona haja kuongeza nguvu ya kuwajengea uwezo na akina baba pia ili wote waende pamoja katika usimamizi wa misitu.

Bi Fadhila Kateta 

Mafunzo hayo ya siku tatu yamefanyika Mkoani Morogoro siku ya Jumatano ya tarehe 11 Mei 2022 ambapo mashirika hayo yamepata mafunzo ili wakaweze kutoa ujumbe huo unaohusisha maswala ya kijinsia kwa jamii na na kuona namna gani mradi huo unaweza ukasaidia kuongeza mnyororo wa thamani kwa mazao ya misitu.

Habari na Picha: Amina Hezron - SUAMEDIA